Islamic Calendar Iste'mal Karne Ki Ahemiyat

Hame Chahiye Ke Hum Islami Taarikh /Chand Ki Taarikh Ke Iste'mal Ki A'adat Daalein , Apne Rozana Ke Iste'mal Mein Chand Ki Taarikh Ko Saamne Rakhein , Bhale Hi Angrezi Taarikh Ka Iste'mal Gunah Nahi Hai, Shariyat Ne Uske Iste'mal Ki Bhi Ijaazat Di Hai ; Lekin Angrezi Taarikh Ka Aisa Iste'mal Ke Hum Islami Taarikh Ko Bilkul Bhula Baithe , Ye Kisi Tarah Durust Nahi. Isliye Ke Islami Taarikh Ki Hifaazat Bhi Musalmanon Ka Farz Hai Aur Uske Iste'mal Mein Sawaab Hai Jis Se Mehroom Nahi Hona Chahiye. 

Apni Pehchaan Ko Baaki Rakhna Bhi Ek Gairat- Mand Musalman Ke Liye Badi Ahmiyat Rakhta Hai , Is Ma'amle Mein Iski Behtar Shakal Ye Hai Ke Hum Chand Ki Taarikh Ke Iste'mal Ke Saath Saath Doosri Taarikh Bhi Iste'mal Karein. 

Khuda Na Kare ! Agar Sab Musalman Islami Taarikh Ko Chhod Baithe Aur Bhula Dein To Sab Ke Sab Allah Ke Yahan Mujrim Honge ; Isliye Ke Islam Ki Bahot Saari I'badaat Ka Ta'alluq Isi Taarikh Se Hai, Jaise :- Roza ,Zakaat ,Hajj, Qurbaani, Dono EID, Iddat Wagairah , Agar Chand Ki Taarikh Ma'alum Na Ho To In I'badaton Ko Apne Waqt Par Kaise A'da Kiya Jaayega ?

📕 *(Mustafad:- Bayanul_Quraan,Surah Tobah:-36)*📕

MUFTI YASIR AMAN QASMI AHMEDABAD GUJRAT