Mauzini Notes for Jamia Nizamia Exam Model Papers Q & A

Mauzani Notes in Roman English, Hindi & Urdu - Q & A - Wazu, Ghusl, Najasat, Pani, Kunwein, Pas Khurdah, Azaan wa Aqamat, Masjid, Tasweeb, Namaz e Janaza ke Mukammal Masail Information.

All Islamic courses notes (click here)

Solved Model Paper Question and Answer

1. Wazu ki tamaam Sunnatein ma’ Faraiz wa Mustahabaat wa Makruhaat bayan karte hue Mazoor ke Wazu par raushni dalein.

2. Ghusl ke Faraiz, Sunnatein, Wajibaat, Mustahabaat wa Makruhaat bayan kijiye.

3. Islam mein najasat kisko kehte hain. Agar iske aqsaam hai toh unka naam aur tareef ahkaam kya hai.

4. Pani ke Aqsaam bayan karte hue har ek ki tafseel likhiye.

5. Kunwein mein najasat wakeh hone par iski paaki ke ahkaam bayan kijiye aur kul pani kab na-paak hoga bayan kijiye.

6. Kunwe ke Ahkam (Refer Q5)

7. Pas Khurdah pani ka hukum batate hue paseena aur luaab ka hukum qalam bandh kijiye.

8. Azaan wa Aqamat ke Sunan wa Mustahabaat Makruhaat zikar kijiye.

9. Azaan ki tareef, Haqiqat wa Fazilat bayan karte hue ye bataye ke iska amal Islam mein kis waqt se rayij huwa. Wa neez Azaan ke kalimaat tehreer kijiye.

10. Azaan jo waqt se pehle di jaye uska hukum kya hai, tafseel se bayan kijiy aur bagair Azaan ki Namaz mein raushni daalein.

11. Azaan wa Aqamat ke Kalimat ekhi hai ya alag-alag, dono ke ahkam likhte huwe ye bhi wazeh kijiye ke na-baligh ladka majnoon ya na-paaki ki halat mein bila wazu ya radio, TV ki Azaan ka kya hukum hai.

12. Azaan wa Namaz ke auqaat sharayi wazahat se likhiye.

13. Masjid ke ahkaam bayan kijiye.

14. Tasweeb kisi kehte hai aur uske hukum bayan kijiye.

15. Namaz e Janaza ka Masnoon wa Mustahab tariqa likhiye.

16. Mayyat ke kafan ke mutaluq ahkaam bayan karte huye Mard aur Aurat aur Bacche ke kafan ki tafseel bayan kijiye.

17. Tayammum ki tareef aur uske ahkaam tafseel se likhiye.

All Islamic courses notes (click here)

Q1) Wazu ki tamaam Sunnatein ma’ Faraiz wa Mustahabaat bayan karte hue Mazoor ke Wazu par raushni dalein.

A) Wazu ke Faraiz:- Wazu mein 4 cheezein Farz hai:-

1) Tamaam Chehre ka dhona.

2) Donoo hathoon ka kohniyoon samait dhona.

3) Chohtayi (1/4th) sar ka masah karna.

4) Donoo pairoon ka takhno samait dhona.

Note:- 1) In Aazaon ka sirf ek martaba dhona farz hai

2) In Aazaon mein se agar koi jagah baal barabar bhi khuskq reh jayein toh wazu na hoga.

Wazu ki Sunnatein:- Wazu mein Sunnatein ye hain:-

1) Niyyat karna.

2) Allah ka naam lena.

3) dono haath pahunchoon tak dhona.

4) Kulli karna.

5) Miswak karna.

6) Naak mein pani daalna.

7) Daadhi ka Khilaal karna.

8) Donoo Haathoon ki ungiliyoon ka Khilaal karna.

9) Tamaam Sar ek dafa masah karna.

10) Dono kaano ka ek dafa masah karna.

11) Dono paoon ki ungliyoon ka Khilaal karna.

12) Har aaza ka 3 dafa dhona.

13) Pai dar pai aaza e Wazu ka dhona.

14) tarteeb se Wazu karna .

Wazu ke Mustahabaat:- Wazu mein Mustahabaat e Umoor ye hain:-

1) Oonche maqam par baithna.

2) Qibla Roo hona.

3) Mitti ke bartan se wazu karna.

4) Dahine haath se wazu karna aur naak mein pani lena.

5) Bayein haath se naak saaf karna.

6) Dono haath se moo dhona.

7) Haathoon ka ungliyoon ki taraf se dhona na ki kohniyoon ki taraf se.

8) Kanoo ke masah ke waqt choti ungli ka kanoo ki suraakh mein daalna.

9) Garden ka masah karna.

10) Pairoon ka bayein haath se dhona.

11) Aaza ko dhote waqt malna.

12) Dahine aazu ka bayein aazu se pehle dhona.

13) Aaza ko hudood e mayiyan se ziada dhona.

14) Dhili anghoti ka harkat dena.

15) Wazu karte waqt bila zaroorat kisi se madad na lena.

16) Wazu ke bache hue pani ka khade ho kar pina.

Wazu ke Makruhaat:- Wazu mein Makruhaat e Umoor ye hain:-

1) Jo cheezein wazu me mustahab hai unke khilaaf karna.

2) Pani zarurat se ziada ya kam karch karna.

3) Halat e wazu me bila zarurat shadeed duniya ki batein karna.

4) Moo ya dusre aaza par zoor se pani marna.

5) 3 baar se ziada aaza e wazu ko dhona.

6) Naye pani se 3 baar masah karna.

7) Wazu ke baad haathon ka pani jhatakna.

8) Aurat ke bache hue pani se wazu karna

9) Andar wazu karna.

10) Najees jagah par wazu karna.

Mazoor ka Wazu:-

Wazu mein jin aaza ka dhona farz hai, agar inmein dard ho ya koi aazu phat gaya ho ya aur koi marz ho jiski wajah se inpar pani bahana nuqsan karta ho toh aysi haalat mein inka dhona zaroori nahi – sirf in par masah karlena chahiye aur agar masah bhi nuqsan kare toh yunhi chodh dein. Agar kisi shakhs ko koi aysa marz ho jismein wazu ko todhne wali cheezein barabar jaari rehti hoon. Maslan kisiko hamesha paishab jaari rehta hoon ya reh kharij hoti ho ya zakham se ratubat behti ho ya bawasir ya istehaaza wagaira hoto ayse shakhs ko har Namaz ke waqt naya wazu karle na chahiye.

_____________________________________________________________

Q2) Ghusl ke Faraiz, Sunnatein, Wajibaat, Mustahabaat wa Makruhaat bayan kijiye.

A) Ghusl ke Faraiz:- Ghusl me 3 Farz hain:-

1) Kulli karna.

2) Naak mein paani daalna.

3) Tamaam jism par paani bahana.

Ghusl ki Sunnatein:- Ghusl mein Sunnatein 5 hain:-

1) Dono haathoon ka pahunchoo tak dhona.

2) Sharmgah ka dhona.

3) Jism se najasat ka jahan kahin lagi ho duur karna.

4) Wazu karna.

5) Tamaam jisam par 3 martaba pani bahana.

Ghusl ke Mustahabaat:- Ghusl mein Mustahab ye hain:-

1) Niyyat karna.

2) Haath dhote waqt Bismillah kehna.

3) Jism ko malna.

4) Aysi jagah nahana jahan koi na dekhe.

5) Wo umoor jo wazu mein mustahab hai (siwa e Qibla e roo hone, Dua padhne aur bacha hua pani peene ke).

Ghusl ke Makruhaat:- Ghusl mein ye umoor makruh hai:-

1) Bila zaroorat aysi jageh nahana jahan kisi gair mehram ki nazar pahunch sake.

2) Barhana nahana wale ko Qible ruh hona.

3) Bismillah ke siwa aur duaoon ka padhna.

4) Bila zaroorat kalaam karna.

5) Wo umoor jo wazu me makruh hai.

Wajibaat (Maujibaat) e Ghusl:- Wo umoor jinki wajah se Ghusl farz hota hai

1) Shahawat se mani nikalna.

2) Ahtelaam hona.

3) Wati karna.

4) Haiz ka maukhoof hona.

5) Nifaas ka maukhoof hona.

_______________________________________________________

Q3) Islam mein najasat kisko kehte hain. Agar iske aqsaam hai toh unka naam aur tareef ahkaam kya hai.

A) Najasat ke Aqsaam ye hai:-

1) Najasat e Huqmi.

2) Najasat e Haqiqi.

3) Hadas e Akbar.

4) Hadas e Asghar.

5) Najasat e Ghaliza.

6) Najasat e Khafifa.

1) Najasat Hukmi ki Tareef:- Yani Insan ki wo halat jismein Namaz padhna aur Quran e Majeed ko chuna durust nahi isko hadas bhi kehte hai.

2) Najasat Haqiqi ki Tareef:- Yani paleed wa na-paak cheez jaise paikhana, paishab wagaira.

3) Hadas e Akbar ki Tareef:- Wo halat jismein bagair ghusl ya tayammum ke Namaz padhna aur Quran e Majeed ka chuna durust nahi.

4) Hadas e Asghar ki Tareef:- Wo halat jismein bagair wazu ya tayammum ke Namaz padhna aur Quran e Majeed ko chuna durust nahi.

5) Najasat Ghaliza ki Tareef:- Wo jiske na-paak hone mein kisi qisam ka shubah na ho aur Ulama ka Ikhtelaaf na ho.

6) Najasat Khafifa ki Tareef:- Wo jiske na-paak hone mein shubah ho aur Ulama ka Ikhtelaaf bhi ho.

_____________________________________________________

Q4) Pani ke Aqsaam bayan karte hue har ek ki tafseel likhiye.

A) Pani ke Aqsaam:-

1) Mutlaq

2) Mutaqayyid

3) Jaari

4) Raqeed

5) Kaseer

6) Khaleel

7) Musta’mal

1) Aab e Mutlaq ki Tareef:- Wo pani hai jisko aam bool chaal mein pani kahein aur jo pani ke lafz se fauran zahen mein aajayein. Jaise:- Meenh ka pani, dariya, nadi, nehar, talab, houz, chashma, kunye ka pani, pigla huwa barf, oole aur shabnam ka pani.

2) Aab e Muqayyid ki Tareef:- Wo pani hai jisko aam bool chaal mein pani nahi kehte. Jaise:- Gulab, Tarbooz ka pani, Nariyal ka pani.

Note:- Aab e Muqayyid se wazu wa ghusl durust nahi albatta na-paak cheezein paak ho sakti hai.

3) Aab e Jari ki Tareef:- Wo pani hai jisko loog behta huwa kahein.

4) Aab e Rakid ki Tareef:- Wo pani hai jo ek jageh tehra huwa ho.

5) Aab e Kaseer ki Tareef:- Wo pani hai jiski ek taraf harkat dene par dusri taraf uska asar na ho.

6) Aab e Khaleel ki Tareef:- Wo pani hai jo kaseer na ho, yani dah dar dah se kam ho dah dar dah yani 10 ghaz tool 10 ghaz arz marbah ho wo aab e khaleel hai.

7) Aab e Musta’mal ki Tareef:- Wo pani hai jis se hadas duur kia jaye ya sawab hasil karne ke liye sarf kia jaye.

1) Aab e Mutlaq ke Ahkaam:-

a) Aab e Mutlaq paak hai aur usse wazu wa ghusl bhi durust hai aur na-paak cheezein bhi paak hojati hai.

b) Aab e Mutlaq ziada tehre ya bandh rehne ya kisi bartan mein rakhe rehne se ya usmein darakhtoon ke phool patte girne se na-paak nahi hota.

c) Agar che uske tenoon wasf (rang, boo, mazah) badal jaye.

d) Agar Aab e Mutlaq me koi na-paak shaiy mil jaye maslan chuna ya koi aysi cheez milayein ya milakar pakayein jisse maqsood mail saaf karna ho. Jaise:- saaboon ya baira ke patte wagaira jiski wajah se (rang, boo, mazah) badal jaye lekin pani ki tabiyat na badle yani patlapan aur naan bakhi rahe to usse wazu aur ghusl durust hai.

3) Aab e Jaari ke Ahkaam:-

a) Aab e Jaari najasat ke girne ya kisi jaanwar ke gir kar mar jane se na-paak nahi hota jab tak ke uska koi wasf (rang, boo, mazah) badal na jaye.

b) Agar ek wasf bhi badal jaye to na-paak hojayega.

c) chath ke par-naale se jo mayh ka pani gire wo aab e jaari ke hukum me dhakhil aur paak hai.

4) Aab e kaseer ka bayan:-

a) Aab e jaari ke hukum mein hai yani najasat ke girne se na-paak nahi hota jab tak ke najasat ki wajah se pani ka koi wasf badal na jaye.

b) Agar koi houz ya chashma aysa ho jiska pani upar se dah dar dah aur niche se kam ho uske bawajood najasat girne se wazu wa ghusl durust hai aur jo houz ya chashma upar se dah dar dah se kam aur niche se dah dar dah ho aur usmein najasat gir jaye toh usse wazu aur ghusl durust nahi jab tak ke upar ka pani khatm hokar dah dar dah ki hadh ko na pahunche.

5) Aab e Khaleel ke Ahkaam:-

a) Aab e khaleel thodi si najasat (maslan ek khatra sharab, ya paishab, ya khoon, ya zara sa paikhana) se na-paak hojata hai.

b) Jungle mein ja-ba-ja barish ka pani jo jama hojata hai agar wo khaleel hai aur ba-zahir ismein najasat nahi maloom hoti to paak hai.

__________________________________________________________

Q5) Kunwein mein najasat wakeh hone par iski paaki ke ahkaam bayan kijiye aur kul pani kab na-paak hoga bayan kijiye.

1. Kunwe ka pani jab tak ke ismein koi aysi cheez na gire jiske girne se pani na-paak hojata hai. Kunwe ka kul pani na-paak hojata hai.

2. Najasat thodi ho ya bahut khafifa ho ya ghaliza maslan ek khatra (sharab ka, ya paishab ka, ya khoon ka).

3. bade jism waale jaandaar maslan (bakri, aadmi wagaira) kunwe me gir kar mar jayein.

4. Jin jaanwaroon ke andar khoon jari ho khaw chote ho maslan chidiya chuha wagair.

Note:- Kunwe mein girne waale jaanwaroon ki shariyat mein 3 qismein hai, Bakri, billi, chuha. Jo jaanwar bakri ke barabar ya bakri se bada hai wo bakri ke hukum mein hai. Ishi tarha jo jaanwar billi ke barabar ya billi se bada lekin bakri se chota hai wo billi ke hukum mein hai, aur jo jaanwar chuhe ke barabar ya chuhe se bada lekin billi se chota hai wo chuhe ke hukum mein hai.

5. Suwwar ka majarrad girne khaw mar ya na mare. Suwwar ka badan maslan paikhana paishab ke najasatain hai pas iska ek baal bhi kunwe mein gir jaye toh kul pani na-paak hojayega.

Wo cheezein jinke girne se kunwe ka kul pani na-paak nahi hota aur unka hukum.

1) Chuha ya chidiya inke barabar ya inse bada magar billi se chota koi jaanwar kunwe mein gir kar marjaye ya mar kar gire lekin phule phate nahi toh kul pani na-paak na hoga aur us surat mein 20 ya 30 dool tak pani nikal dene se paak hojayega. (20 dool nikalna wajeeb aur 30 dool nikalna mustahab hai).

2) Billi ya kabutar (ya inke barabar ya inse bada magar bakri se chota koi jaanwar) kunwe mein gir kar mare, ya mara huwa gire lekin phule phate nahi toh kul pani na-paak na hoga aur us surat mein 40 ya 60 dool tak pani nikalne se kunwa paak hojayega (40 dool nikalna wajeeb aur 60 nikalna mustahab hai).

Jin cheezoon se kunwa na-paak nahi hota.

1) Aab e jaanwar.

2) Oont wa bakri ki ek ya do maygniyaan.

3) Kawwa, cheel, wagaira ki bhaith gir ne se kunwa na-paak na hoga.

4) Aadmi ka ghosht ya khaal nakhoon se kam kunwe mein gir jaye to na-paak na hoga.

5) Agar aadmi kunwe mein gir jaye aur zinda nikal aaye ya dool wagaira nikalne ke liye ghoota lagaye to kunwa na-paak na hoga.

6) Ba-shart e ke uske kapde ya jism par najasat na ho.

7) Agar (suwwar ke siwa) koi bhi jaanwar kunwe mein gir jayein aur phir zinda nikal aaye toh kunwa na-paak na hoga.

Q6) Kunwe ke Ahkam (Refer Q5)

Q7) Pas Khurdah pani ka hukum batate hue paseena aur luaab ka hukum qalam bandh kijiye.

A) Pas Khurdah (Jhoote) ke Ahkam:-

Jinka jhoota paak hai:- Aadmi ka jhoota paak hai khaw Musalmaan ho ya kafir mard ho ya aurat. Ghode, halaal jaanwar (chawpai ho ya parinde) (Halaal ho ya Haraam) in sab ka jhoota paak hai bashart e ke inka moo najasat aaloodah na ho.

Note:- Kocha, gird, murgi aur gaye najaas khawar ka jhoota makruh hai.

Jinka jhoota makruh hai:- Jo haram jaanwar ghar me rehte hai jaise:- Billi, chuha, chipkali wagaira.

Jinka ka jhoota mashqooq hai:- Khacchar, ghade ka jhoota.

Jinka ka jhoota na-paak hai:- Suvvar, kutta, haati wagaira kul haraam chaupaye jaanwaroon ka jhoota na-paak hai.

Paseena aur Luaab ka Hukum:- Aadmi ka paseena paak hai har jaanwar ka paseena aur luaab is jhoote ke hukum mein hai agar jhoota paak hai to ye bhi paak aur agar jhoota na-paak ya mashqooq wa makruh hai toh ye bhi na-paak ya mashqooq wa makruh. Haati ki soont se jo luaab girta hai won na-paak hai.

_____________________________________________________

Q8) Azaan wa Aqamat ke Sunan wa Mustahabaat Makruhaat zikar kijiye.

1) Azaan ka kisi oonche maqam par magar kharij Masjid kehna (aur Aqamat ka Masjid ke andar kehna. Speaker ki surat mein Azaan dakhil Masjid mein bhi de sakte hai.

2) Azaan ka khade hokar kehna.

3) Azaan ka buland awaaz se kehna.

4) Azaan kehte waqt kaanoo ke surakhoon mein kalme ki ungliyaan rakhlena.

5) Azaan ke alfaaz ka tehar-tehar kar ada karna aur Aqamat ka jald-jald.

6) Azaan mein Hayya Alas-Salah kehte waqt dahini taraf aur Hayya Alal-Falah kehte waqt bayein taraf moo pehrna (istarha ke seene aur khadm Qible se na pehr paye.

7) Azaan aur Aqamat ka Qibla rukh hokar kehna.

8) Azaan aur Aqamat ke alfaz ka tarteebwaar kehna.

9) Azaan aur Aqamat ki haalat mein koi dusra kalaam na karna (agarche jawab e Salaam hi kyun na ho).

Note:- 1. Azaan kehte waqt hadas e Akbar se paak hona Sunnat aur (Hadas e Akbar ke saath) Hadas e Asghar se bhi paak hona Mustahab hai.

2. Aqamat kehte waqt in donoo se paak hona Sunnat hai.

_______________________________________________________

Q9) Azaan ki tareef, Haqiqat wa Fazilat bayan karte hue ye bataye ke iska amal Islam mein kis waqt se rayij huwa. Wa neez Azaan ke kalimaat tehreer kijiye.

A) Azaan ki tareef:- Azaan ke mane aagah wa khabardaar karne ke hai aur istelah shara mein Farz Namazoon ke liye maqsoos tariqe aur muqarrarah kalimat ke zariye logoon ko khabardaar karne ka naam Azaan hai.

Azaan ki Fazilat:- Azaan Azkar e Ilahi mein ek bahut bade rutbe ki haamil hai ismein Tawheed wa Risalat ki Shahadatain alal ailaan hoti hai. Isse Islam ki shaan aur barkat ka izhaar hota hai. Iski Hadees mein badi fazilat aayi hai chunache Nabi e Kareem (SAWS) ne farmaya Ambiya wa Shohada ke baad Azaan dene wale Jannat mein dakhil honge aur farmaya ke Jahan tak Azaan jati hai wahan tak ki sab cheezein qiyamat ke din Azaan dene wale ke Iman ki gawahi deinge aur Irshad huwa ke agar logoon ko maloom hojaye ke Azaan kehne mein kis qadr sawab hai aur phir unko ye mansab bagair khurra dale na mile toh woh zaroor khurra daleinge farmaya ke agar koi shakhs 7 baras tak mehaz sawab ke waaste Azaan kahe toh iske liye dozakh se najat aur Jannat ki khushkhabri hai. Azaan dete waqt shaitan par nihayat khawf wa haibat taari hoti hai jisse wo badh-hawaas hokar bhaghta hai. Jahan tak Azaan ki awaz jaati hai nahi teharta, jis maqam par Azaan kahi jaati hai wahan Allah SWT ki Rahmat nazil hoti hai aur wo maqam aafat aur balayyat se duur hota hai.

Azaan ki Haqiqat:- Azaan ek muqtasar magar nihayat hi jamay aur mutabarrik kalaam hai.

Azaan ki Ibteda:- Ibteda e Islam mein jab Namaz ka waqt hota toh loog ke khud-ba-khud Masjid mein jama hojate thay, logoon ko Namaz ki ittelah dene ka abtak bada koi tariqa nahi thaa, Nabi e kareem SAWS ne Sahaba e Ikram se mashaura farmaya, kisine nakhoos istemaal karne ke baare mein arz kiya aur kisine bagal bajane ke baare mein “Nakhoos” nasara ka tariqa thaa aur “Bagal” yahudiyoon ka yahood wa Nasara se Mushabahat ki wajah se aapne un donoo tariqoon ko pasand nahi farmaya. Hazrat Umar e Farooq RZ ne arz kiya ke Namaz ke waqt koi shakhs Musalmanoon ki aabadiyoon mein jaakar Namaz ka aylaan karde Nabi e Kareem SAWS ne is Mashoore ko pasand farmaya aur Hz. Bilaal RZ ko hukum farmaya ke Namazoon ke waqt “Assalatu Jaamiatun” kahe kar Namazoon ka aylaan kare, chunache is tarha Namaz ka aylaan hota raha. Ek Sahabi Hz. Abudullah bin Zaid RZ ne khawb mein dekha ke koi Azaan ke alfaz kehraha hai, unhone Nabi e Kareem SAWS ki khidmat e aqdas mein hazir hokar apne khawb ka zikar kiya Nabi e Kareem SAWS ne farmaya ye saccha khawb hai, ishi asna me Hz. Umar e Farooq RZ apni chadar kheencte huye hazir hue aur arz kiya Ya Rasoolullah SAWS! Maine bhi ishi tarha khawb dekha, Aap ne Hz. Abdullah bin Zaid RZ. Se farmaya ke Hz. Bilaal Rz ko ye kalimaat kehte jao taake wo un kalimaat ke saath Azaan kahein kyunki wo buland awaz hai.

Azaan ke Kalimaat:- Azaan ke Kul 15 Kalimaat hai.

ALLAHU AKBAR (4 Baar), ASHADU-ALLAAILAHA-ILLALLAA (2 baar), ASH-HADU-ANNA-MUHAMMADAR-RASOOLULLAA (2 baar), HAYYA ALAS-SALAAH (2 baar), HAYYA ALAL-FALAH (2 baar), ALLAHU AKBAR, ALLAHU AKBAR, LAA-ILAAHA-ILLALLAA. Lekin Fajr ki Azaan mein (HAYYA ALAL FALAH) ke baad kalma (ASSALATU-KHAIRUM-MINANNAUM) do baar ziada kiya jata hai, iss lehaz se Fajr ki Azaan mein 17 kalimaat hai.

______________________________________________________

Q10) Azaan jo waqt se pehle di jaye uska hukum kya hai, tafseel se bayan kijiy aur bagair Azaan ki Namaz mein raushni daalein.

A) Azaan ki sahi hone ki shartein:-

1) Jis Namaz ke liye Azaan di jaye uske waqt ka hona agar waqt se pehle di jaye to sahi nahi waqt aane ke baad phir lautayi jayegi khaw Fajr ki Azaan ho ya kisi aur waqt ki.

2) Farz Namaz ka bagair Azaan wa Aqamat ke Masjid mein padhna Makruh hai.

______________________________________________________

Q11) Azaan wa Aqamat ke Kalimat ekhi hai ya alag-alag, dono ke ahkam likhte huwe ye bhi wazeh kijiye ke na-baligh ladka majnoon ya na-paaki ki halat mein bila wazu ya radio, TV ki Azaan ka kya hukum hai.

A) Azaan wa Aqamat ke kalimat ekhi hai, Aqamat mein sirf (Khad kha ma tis-Salaah) ziada hai aur na-baligh, majnoon ya na-paaki ki haalat mein bila-wazu ya radio, tv ki Azaan ka jawab nahi dena chahiye.

Wo ashkhaas jinke Azaan wa Aqamat na-jaiz wa ya makruh hai:-

Na-samajh baccha, majnoon ki Azaan wa Aqamat na-jaiz hai. Agar ye dono Azaan wa Aqamat kahein to lautana lazim hai. Aurat, nashewaale aur fasiqh ki Azaan makruh hai. Lekin fasiqh ki Azaan baujood karahyat ke lautayi na jaye. Albatta aurat aur nashewaale ki Azaan ka lautana mustahab hai. Junbi (wo shakhs jisko ghusl ki hajat ho) ki Azaan wa Aqamat dono makruh hai, magar junbi ki Azaan lautayi jaye aur Aqamat na lautayi jaye, na-baligh magar samajhdaar ladke ki Azaan wa Aqamat jaiz hai. Be-wazu shakhs ki Azaan durust magar Aqamat makruh hai.

______________________________________________________

Q12) Azaan wa Namaz ke auqaat sharayi wazahat se likhiye.

A) Fajar ka Waqt:- Subah sadiqh se shuru hota hai aur kinarah aftab ke tulu hone tak rehta hai. Subah sadiqh us safeedi ko kehte hai jo aasmaan ke mashriqi kinare par suraj nikalne tak pehli hoti hai.

Zuhar ka Waqt:- Zawaal e Aftaab ke baad shuru hota aur har cheez ka saye (saye asli ki siva) do mashl (yani uske do barabar) hone tak rehta hai (Namaz e Juma ka bhi yahi waqt hai).

Asar ka Waqt:- say eke do mashl ho jane ke baad shuru hota hai aur aftab ke gurub hone tak rehta hai.

Maghrib ka Waqt:- Aftab e Guroob hone ke baad shuru hota aur safaid shafaqh ke gayab hone tak rehta hai.

Isha ka Waqt:- Safaid shafaqh ke gayab hone ke baad shuru hota aur subah sadiq tak rehta aur witr ka waqt bhi yehi hai. Lekin witr ko Namaz e Isha ke baad padhna chahiye.

Note:- 1. Abar ke dino mein Asar wa Isha jald aur baqi Namazein taqeer se padhein.

2. Aftab ke zard hojane tak Namaz e Asar mein sitaron ki acchi tarah nikal aane tak Namaz e Maghrib mein aur aadhi raat se zayed tak Namaz e Isha mein bila uzr taqeer karna makruh e tehrimi hai.

______________________________________________________

Q13) Masjid ke ahkaam bayan kijiye.

1) Masjid mein duniya ki batein na karein.

2) Masjid ke andar khane pine sone se aiteraaz karein.

3) Masjid mein gumshuda cheez ki talash na karein.

4) Masjid ki ghaans ya kuda kachra wagaira ba-tazeem jagah na phainke.

5) Masjid ka darwaza bandh karna makruh hai.

6) Masjid mein ladayi jhaghda shoorgul karna makruh hai.

7) Lehsen piyaz wagaira badhbudaar cheezein khakar Masjid mein dakhil hona ye sab umoor makruh e tehrimi hai.

8) Junib aur haiz ka Masjid mein dakhil hona haraam hai.

Masjid kisi sayil ko sawal karna haram hai.

9) Masjid ke ander majlis e Nikah ka munakhid karna aur Nikah karna Mustahab hai.

10) Masjid ka raasta karaar dena jaiz nahi.

11) Masjid se kabutar ababeel wagaira ke ghonsloon ka nikalkar phaink dena jaiz hai agarche unmein ande bacche nahi hoon.

12) Masjid ko goobar makdi ke jaale wagaira se paak aur saaf rakhna chahiye.

______________________________________________________

Q14) Tasweeb kisi kehte hai aur uske hukum bayan kijiye.

A) Tasweeb ka Bayan aur uske hukum:-

1) Azaan wa Aqamat ke darmiyan phir Namaz ki ittelah dene ka naam tasweeb hai. (maslan As-salah, As-salah, ya Namaz tayyar hai kehna).

2) Maghrib ke siva aur waqtoon mein tasweeb jaiz hai.

3) Fajar mein tasweeb Azaan ke uss qadr deiyr ke baad ki jaye jismein 20 aayatoon ki tilawat hosake. Phir iske baad ushi qadr tawakkoof se Aqamat ki jaye.

4) Azaan wa Aqamat ke darmiyan do-chaar rakat ki miqdar (jiski har rakat mein 10 ayat ke barabar qirat padhi jaye) fasl honi chahiye.

5) Tasweeb ka Arabi zubaan mein hona kuch zaroori nahi, agar koi yun kehde ke “Jamaat tayyar hai ya Namaz hoti hai ya koi lafz tabbhi durust hai, ya agar sirf khansne se loog samajh jaye to bhi tasweeb hai.

_________________________________________________________

Q15) Namaz e Janaza ka Masnoon wa Mustahab tariqa likhiye.

A) A) Namaz e Janaza ka tariqa:- Mayyat ko aage rakhkar miam sine ke muqabil khada hojaye, phir imam aur tamaam muqtadi Namaz e Janaza ki niyyat kare ye ke Namaz e Janaza farz e kifaya padhta hoon main Allah tala ke waste aur dua karta hoon main is mayyat ke waste moo mera ka’abe shareef ki taraf tabe imam ke. Phir dono haath misle Takbeer e Tehrima ke kanoo tak uthakar ek martaba Allahu Akbar kehkar hatoon ko namaz ki tarha naaf ke nichein bandhle aur Sana padhe “Subhanakallahumma Wa Bihamdika Wa Tabara Kasmuka Wa Ta’aala Jadduka Wa Jalla Sanaauka Walailaha Ghairuk”. Phir dusiri dafa Allahu Akbar kahe lekin is dafa haath na uthaye phir Durood e Ibhrahim padhe jo namaz mein padhte hai, phir tisiri dafa Allahu Akbar kahe iske baad mayyat ke liye dua padhein.

Baligh mayyat ki dua:- “Allahummagfirli Hayyina Wa Mayyatina Wa Shaahidina Wa Gaayibina Wa Sagheerina Wa Kabeerina Wa Zakarina Wa Unsaana. Allahumma Mann Ahyaytahu Minna Fa Ahyihi Alal Islam Wa Mann Tawaffaitahu Minna Fatawaffahu Alal Imaan”.

Na-Baligh ladke ki dua:- “Allahummaj Al Hulana Faratanwn Waja Al Hulana Ajraunwazugra Waja Al Hulana Shafiunw Wa Mushaffa’a”.

Na-Baligh ladki ki dua:- “Allahummaj Al Halana Faratanwn Waja Al Halana Ajraunwazugra Waja Al Halana Shafiunw Wa Mushaffa’a”.

Phir chauti dafa Allahu Akbar kahein aur dayein bayein salam pherdein jis tarha namaz mein phertei hai. Janaze ki namaz mein mustahab hai ke hazireen ki teen saffein ki jaye yahan tak ke agar sirf 7 admi hoto unmein se ek imam bane phir pehli saff mein teen aadmi khade ho aur dusiri saff mein do admi aur tisiri saff mein ek admi.

________________________________________________________

Q16) Mayyat ke kafan ke mutaluq ahkaam bayan karte huye Mard aur Aurat aur Bacche ke kafan ki tafseel bayan kijiye.

A) Kafan aur uske mutaluq ahkaam:-

1) Mayyat ko kafan dena (ghusl ki tarah) farz e kifaya hai.

2) Mard ke kafan mein 3 kapde masnoon hai. 1. Chadar, 2. Tehbandh, 3. Kafni. Aur aurat ke kafan mein 5 hai. 1. Chadar, 2. Tehbandh, 3. Kafni, 4. Seena bandh, 5. Oodhni. Note:- Chadar ki miqdaar utni honi chahiye jo sir se lekar payr tak kaafi ho, Tehbandh bhi goya chadar hi hai lekin pehli chadar se kisi qadar choti ya bhi sir se payr tak hoti hai. Kafni ek qisam ka kurta hai, jo garden se lekar payr tak hota hai. Magar usmein asteen wa kali nahi hoti. Seena bandh ki miqdar seene se lekar ranoo tak aur oodhni 3 haat tool 2 baalish arz.

3) Agar kafan masnoon na mile toh mard ko sirf do kapde chadar, tehbandh aur aurat ko 3 kapde chadar, tehbandh aur oondhni bhi kafi hai.

4) Qudrat hone par mard ko 3 aur aurat ko 5 kapdoon se kam nahi dena chahiye aur usmein ziadati bhi jaiz nahi.

5) Chote baccho ko ek-do kapdoon mein kafan dena jaiz hai.

6) Shaheed ko kafan dene ki zaroorat nahi, balke pehne hue khoon aaluda kapdoon mein hi dafnadein.

______________________________________________________

Q17) Tayammum ki tareef aur uske ahkaam tafseel se likhiye.

A) Tayammum ki Tareef:- (Istelah Shara mein) paak karne waali mitti ya Jisn mitti par (ba-sharte ke niyyat) haath markar chehra aur dono haatoon par masah karne ka naam Tayammum hai.

Tayammum ke Ahkam:- Tayammum wuzu aur ghusl ka qayam maqaam hai.

Tayammum ke sahi hone ki shartein:- Tayammum ke 6 shartein hai.

1) Niyyat.

2) Masah karna.

3) 3 ya ziada ungliyoon se masah karna.

4) Mitti ya jins mitti ka hona.

5) Mitti ya jins mitti ka muthhar paak karne waali hona.

6) Paani par qudrat na hona.

Niyyat ke Ahkaam:- 1. Jo umoor Ibadat maqsoodah nahi agar unke liye tayammum kiya jaye toh usse Namaz jaiz nahi.

2. Sajdah e Tilawat ke Tayammum se bhi Namaz jaiz hai.

3. Agar bimar ko dusra shakhs Tayammum karayi toh niyyat bimar ko karni chahiye.

Tayammum Jaiz hone ki Suratein:-

1) Paani maujood naho aur ek meel tak na milein.

2) Paani maujood ho magar iske istemal se bimari badh jane ya sehat mein deyr hone ka khawf ho.

3) Wazu ya ghusl karne mein kisi aysi Namaz ka faut hojane ka khauf ho jiski khaza ya badal nahi. Jaise Eidain ki Namaz.

4) Agar paani qareeb milne ka gumaan hoto talash karna, ya kisi ke paas maujood ho aur milne ki tawaqqo ho to talab karna farz hai. Bagair talash ya talab ke Tayammum jaiz nahi.

Tayammum ke Arkan:- Tayammum ke 2 Arkan hai:-

1) 2 zarb yani pehli dafa mitti par haath markar moo par masah karna, phir dusri dafa haath markar dono haathoon par kohniyoon samayth masah karna.

2) Isteaab (yani pure moo aur dono haathon par is tarha masah karna ke koi jagah baal barabar bhi baqhi na rahe.

Tayammum ki Sunnatein:- Tayammum mein 8 Sunnatein hai:-

1) Bismillah kehna.

2) Dono hateliyoon ko andar ki taraf se mitti par malna.

3) Hateliyoon ko mitti par rakhkar aage kheenchna.

4) Hateliyon ka piche hatana.

5) Haathon se mitti ka jhad dalna.

6) Mitti par haath rakhne ke waqt ungliyoon ka kushada rakhna.

7) Tarteeb.

8) Pai dar pai bila tawaqquf masah karna.

Jinn cheezoon se Tayammum toot jaata hai:-

1) Jin cheezoon se wazu toot ta hai unse wazu ka Tayammum bhi tootta hai, aur jinse ghusl wajeeb hota hai unse ghusl ka Tayammum toot jata hai.

2) Jis aazah ki wajah se Tayammum kiya gaya thaa uska zail hojana maslan paani ka milna ya paani ke istemal par qadr hona.

______________________________________________________

All Islamic courses notes (click here)